Joe 3 | MEU | STEP | A itaia, Iuda bona Ierusalem baina hanamodia lou negana ai, unu dinadia ai bona una negana ai

Joel 3

Iehova ena hahemaoro bese idau-idau latadiai

1 A itaia, Iuda bona Ierusalem baina hanamodia lou negana ai, unu dinadia ai bona una negana ai 2 lau ese bese iboudiai baina haboudia, Iehosafat ena koura lalonai baina hakaudia diho. Unuseni ai lau ese baina hahemaoro henidia, egu bese taudia daidiai, bona dihigu Israel dainai; badina be idia na vada e karoho rohoroho bese idau-idau bogaragidiai, bona egu tano vada e haria; 3 mari vada e kara, egu bese taudia iabidia; mero ta vada e heni, ariara hahinena davana; bona kekeni ta vada e hoia, vine ranuna davana, bena una vine ranuna vada e inua.

4 Turo bona Sidono bona Filistia kahadia iboudiai, umui be dahaka lauegu ai? Egu kara ta davana egu ai o halouamu a? Bema dava ta o halouamu, lau ese emui kara davana na kwaramui ai ma baina haloua haraga-haraga. 5 Badina be umui ese egusilver bona egugold vada o abi, bona egu kohu namo-hereadia na emui dubu lalodiai vada o huadia vareai. 6 Iuda bona Ierusalem taudia vada o hoidia, Helene taudia ediai; edia tano amo vada o abidia oho dauhai. 7 A harihari lau ese o ha hoidia gabudia lalodiai baina haraiva-raivadia, bona emui kara davana na kwaramui ai baina haloudia. 8 Natumui mamaruanedia bona hahinedia na lau ese baina hoidia Iuda garana imadia ai; bena idia ese Sabea taudia ediai ma bae ha hoidia, dauhai e nohomu besena taudia ediai; badula be Iehova vada e hereva.

9 Bese idau-idau bogaragidiai ini ba gwau toma:
Tuari ba hegaegaelaia,
goada taudia ba haraiva-raivadia.
Tuari taudia iboudiai na bae raka kahi mai,
bae dae baema.
10 Emui ruarua auridia na dare ba karalai,
bona emui ilapa na io ba karalai;
bena manoka tauna baineto “Lau na tuari taugu”.

11 Aoma haraga-haraga,
heḡeḡe-madai besedia iboumui ai;
unuseIli ai ba hahebou.
Iehova e,
emu tuari taudia ba hakaudia diho.
12 Bese idau-idau bae tore tore isi,
bae dara dae, Iehosafat ena koura baema;
badina be unuseni ai baina helai,
heḡeḡe-madai besedia iboudiai baina hahemaoro henidia.

13 Ba lapa lapa,
badina be uit iutuna negana vada e kau.
A raka vareai, ba moi tao moi tao;
badina be vine itaolaina gabuna vada eme honu.
Uro anidia e hepurai dobimu,
badina be edia dika na bada herea.

14 Hutuma, hutuma herea,
lalo-davari kourana ai!
Badina be Iehova ena dina vada eme kahira-kahira,
lalo-davari kourana ai!
15 Dina bona hua na e diburamu,
bona hisiu na asie nakamu.

Iuda ihamaurina

16 Iehova na Siona amo e lolomu,
Ierusalem amo e herevamu,
bena guba bona tanobada e heude-heudemu.
A Iehova na ena bese taudia edia roho-mauri gabuna,
Israel taudia edia gabu aukana.

17 Taunabunai umui ba diba lau na Iehova, emui Dirava;
Siona ai, egu ororo helaḡana ai, na nohomu.
Ierusalem do baine helaga,
bona idau taudia ese basie rakaia hanai lou.

18 Una dina ai
vine ranuna gaihona na ororo amo baine hetuturu dobi,
bona ororo komutadia ai rata baine aru,
bona Iuda koupadia iboudiai lalodiai ranu baine aru;
Iehova ena dubu amo ranu baine lohilohia,
Sitim kourana baine haranua.

19 Aigupto baine vahu,
bona Edom baine ḡaḡae vaitani,
Iuda taudia na e daḡedaḡe henidia dainai;
badina be asi edia kerere taudia raradia na
edia tano ai e hahebubu.
20 A Iuda na bae noholaia hanaihanai,
bona Ierusalem danu ela bona uru iboudiai.
21 Raradia davadia baina abi,
bona kerere taudia na maorodia basina gwaurai;
badina be Iehova na Siona ai e nohomu.